🚨 बारकोड नसल्याने नववधूंची आधार दुरुस्ती ठप्प; ऑनलाइन विवाह प्रमाणपत्राची जोरदार मागणी!

स्टार माझा न्यूज परंडा | प्रतिनिधी

दि. ११ जुलै २०२६ आधार कार्ड दुरुस्तीसाठी ऑनलाइन विवाह नोंदणी प्रमाणपत्राची मागणी; प्रमाणपत्रावर बारकोड नसल्याने नववधूंची मोठी अडचण

परंडा : परंडा शहरातील विवाह नोंदणी विभागाकडून विवाह नोंदणीचे प्रमाणपत्र दिले जात असले, तरी त्या प्रमाणपत्रावर बारकोड नसल्यामुळे नववधूंना आधार कार्डवरील नाव बदलण्यास मोठ्या अडचणींचा सामना करावा लागत असल्याची बाब समोर आली आहे. यामुळे अनेक नववधू शासनाच्या विविध योजनांपासून वंचित राहत असून, आवश्यक कागदपत्रांअभावी त्यांना अनेक प्रशासकीय अडचणींना सामोरे जावे लागत आहे.

परंडा शहरात विवाह झाल्यानंतर शासनाच्या नियमानुसार वधू-वर विवाह निबंधक कार्यालयात विवाह नोंदणी करतात. मात्र, शहरातील विवाह नोंदणी विभागाकडून देण्यात येणाऱ्या प्रमाणपत्रावर बारकोड नसल्याने ते आधार कार्ड दुरुस्तीसाठी ऑनलाइन ग्राह्य धरले जात नसल्याची तक्रार नागरिकांनी केली आहे.

या समस्येमुळे अनेक नववधूंना आधार कार्डवरील नाव बदलता आले नाही. परिणामी शासनाच्या विविध योजनांचा लाभ घेणे कठीण झाले असून, नुकत्याच पार पडलेल्या नगरपालिकेच्या निवडणुकीतही काही नववधूंना मतदानाचा हक्क बजावता आला नसल्याचे सांगण्यात आले आहे.

विशेष म्हणजे, परंडा तालुक्यातील ग्रामीण भागात विवाह नोंदणी केल्यानंतर बारकोडयुक्त ऑनलाइन प्रमाणपत्र उपलब्ध होत असल्याचे नागरिकांचे म्हणणे आहे. मात्र, परंडा शहरातील विवाह नोंदणी विभागातून अशी सुविधा उपलब्ध नसल्याने सर्वसामान्य नागरिकांमध्ये नाराजीचे वातावरण आहे.

या पार्श्वभूमीवर पत्रकार श्रीराम विद्वत यांनी धाराशिव जिल्हाधिकाऱ्यांना लेखी निवेदन देऊन परंडा शहरातील विवाह नोंदणी विभागातूनही बारकोडयुक्त ऑनलाइन विवाह नोंदणी प्रमाणपत्र उपलब्ध करून द्यावे, अशी मागणी केली आहे.

नागरिकांनीही वरिष्ठ अधिकाऱ्यांनी या गंभीर प्रश्नाकडे तातडीने लक्ष देऊन नववधूंना होणारा मनस्ताप थांबवण्यासाठी आवश्यक कार्यवाही करावी, अशी अपेक्षा व्यक्त केली आहे.

स्टार माझा न्यूज संपादक : रियाज पठाण

📞 संपर्क : 9405749898 / 9408749898