🔥 “बार्शी बायपासवर हॉटेल्सच्या आडून दारूचा काळाबाजार? पोलिसांच्या कारवाईची प्रतीक्षा!” 🔥

बार्शी : शहरालगत असलेल्या बायपास रोडवरील काही हॉटेल्समध्ये उघडपणे अवैध दारू विक्री होत असल्याचे निदर्शनास येत आहे. सूत्रांच्या माहितीनुसार, येथील जेवणाच्या हॉटेल्समध्ये जेवणासोबतच ग्राहकांच्या आवडीनुसार दारूचाही पुरवठा केला जात असल्याची चर्चा परिसरात रंगत आहे.विशेष म्हणजे, बार्शी तालुका पोलीस ठाण्याचे नवनियुक्त सहाय्यक पोलीस निरीक्षक महेश माने यांनी पदभार स्वीकारल्यानंतर सुरुवातीच्या काळात कारवाईचा धडाका लावत आपली वेगळी ओळख निर्माण केली होती. स्पा सेंटरच्या नावाखाली सुरू असलेले जुगार अड्डे उद्ध्वस्त करणे, कोयत्याच्या धाकाने परिसरात दहशत निर्माण करणाऱ्या गुंडांना अटक करणे, लवंगी मिरची कला केंद्रावर मोठी कारवाई करणे, तसेच प्रतिबंधित मांगुर माशांची अवैध वाहतूक करणाऱ्या टोळीवर कारवाई करणे, अशा अनेक मोठ्या कारवायांमुळे माने साहेबांचे नाव चर्चेत आले होते.मात्र एवढ्या मोठ्या कारवाया होत असतानाही बायपासवरील हॉटेल्समधील अवैध दारू विक्रीकडे पोलीस प्रशासनाचे दुर्लक्ष का होत आहे, असा प्रश्न नागरिकांकडून उपस्थित केला जात आहे. काही नागरिकांनी तर थेट “यामागे काही अर्थपूर्ण संबंध आहेत का?” असा सवालही उपस्थित केला आहे.बार्शी तालुका हा शैक्षणिक व सामाजिक दृष्टीने संवेदनशील परिसर असून, बायपासवरील या हॉटेल्समध्ये तरुण पिढी व्यसनाच्या आहारी जाण्याची शक्यता नाकारता येत नाही. त्यामुळे एपीआय महेश माने यांनी या प्रकाराकडे गांभीर्याने लक्ष द्यावे आणि संबंधित हॉटेलचालकांवर तातडीने कारवाई करावी, अशी मागणी नागरिकांमधून होत आहे.आता पोलीस प्रशासन या अवैध दारू विक्रेत्यांवर कारवाईचा बडगा उगारणार का, याकडे संपूर्ण बार्शी तालुक्याचे लक्ष लागले आहे.

स्टार माझा न्यूज | संपादक: रियाज पठाण | संपर्क: 9405749898 / 9408749898