🚨 शिवशक्ती मैदानावरील निष्काळजीपणाचा बळी? रोलरखाली चिरडून 14 वर्षीय मुलाचा दुर्दैवी मृत्यू

⚫ बार्शी शहर हादरले; वीरेन चौधरीच्या मृत्यूने सर्वत्र हळहळ

स्टार माझा न्यूज, बार्शी (प्रतिनिधी) – दिनांक : 30 मे 2026

बार्शी शहरातील श्री शिवाजी शिक्षण प्रसारक मंडळ संचलित शिवशक्ती मैदानावर शनिवारी सकाळी घडलेल्या एका अत्यंत दुर्दैवी घटनेने संपूर्ण शहर शोकसागरात बुडाले आहे. मैदानावर असलेल्या दगडी रोलरखाली चिरडून 14 वर्षीय वीरेन योगीराज चौधरी (रा. सुभाष नगर, बार्शी) या बालकाचा मृत्यू झाला. या घटनेमुळे बार्शीकरांमध्ये तीव्र संताप आणि हळहळ व्यक्त होत आहे.

🔹 खेळण्यासाठी गेला अन् मृत्यूने गाठले

मिळालेल्या प्राथमिक माहितीनुसार, शिवशक्ती मैदानावर दररोज शेकडो विद्यार्थी व्यायाम, धावणे आणि विविध खेळांसाठी येत असतात. मैदान सपाट करण्यासाठी वापरण्यात येणारा दगडी रोलर मैदानावर होता. आज सकाळी सुमारे 7 वाजण्याच्या दरम्यान मैदानावरील काम सुरू असताना अचानक हा भीषण अपघात घडला.

खेळण्यासाठी आलेल्या वीरेन चौधरी याच्या अंगावर दगडी रोलर गेल्याने तो गंभीर जखमी झाला. उपस्थितांनी तातडीने त्याला डॉ. जगदाळे मामा हॉस्पिटलमध्ये दाखल केले. मात्र डॉक्टरांनी तपासणीनंतर उपचारापूर्वीच त्याचा मृत्यू झाल्याचे घोषित केले.

⚠️ सुरक्षा व्यवस्थेवर मोठे प्रश्नचिन्ह

या घटनेनंतर मैदानावरील सुरक्षा व्यवस्थेबाबत गंभीर प्रश्न उपस्थित होत आहेत. मैदानावर सुरक्षा रक्षक होते का? असल्यास त्यांनी आपले कर्तव्य योग्य प्रकारे बजावले का? धोकादायक साहित्याजवळ विद्यार्थ्यांना जाण्यापासून रोखण्यासाठी कोणती उपाययोजना होती? अशा अनेक प्रश्नांची चर्चा शहरभर सुरू आहे.

🔹 जबाबदार कोण?

या दुर्दैवी घटनेनंतर नागरिकांकडून अनेक प्रश्न उपस्थित केले जात आहेत.

👉 मैदानावरील रोलर सुरक्षित ठिकाणी का ठेवण्यात आला नव्हता?

👉 विद्यार्थ्यांच्या सुरक्षेसाठी पुरेशी खबरदारी घेण्यात आली होती का?

👉 मैदान व्यवस्थापनाने आवश्यक सुरक्षा नियमांचे पालन केले होते का?

👉 कोच, कर्मचारी व संबंधित अधिकाऱ्यांची जबाबदारी निश्चित होणार का?

👉 या घटनेची चौकशी करून दोषींवर कारवाई होणार का?

⚫ शहरभर शोककळा

अवघ्या 14 वर्षांच्या मुलाचा अशा दुर्दैवी घटनेत मृत्यू झाल्याने बार्शी शहरात शोककळा पसरली आहे. वीरेन चौधरीच्या निधनामुळे त्याच्या कुटुंबावर दुःखाचा डोंगर कोसळला असून नागरिकांकडून हळहळ व्यक्त केली जात आहे. या घटनेची सखोल चौकशी करून जबाबदारांवर कठोर कारवाई करण्याची मागणी जोर धरू लागली आहे.

बातम्या व जाहिरातीसाठी संपर्क: रियाज पठाण – 9405749898 / 9408749898