🚨 लवंगी मिरची कला कला केंद्रावर मध्यरात्री छापा; 50.13 लाखांचा मुद्देमाल जप्त, 72 जणांवर गुन्हे दाखल!

बार्शी तालुक्यातील मोठी कारवाई; अवैध डान्सबारमधील गैरप्रकार उघडकीस

स्टार माझा न्यूज, बार्शी (प्रतिनिधी) – दिनांक : 24/05/2026

बार्शी तालुका पोलिसांनी तालुक्यातील लवंगी मिरची (कला केंद्र) येथे धाडसी छापा टाकून मोठी कारवाई केली आहे. या कारवाईत तब्बल 50 लाख 13 हजार 460 रुपयांचा मुद्देमाल जप्त करण्यात आला असून नृत्य करणाऱ्या महिला, ग्राहक, चालक आणि संबंधित मालकांसह 72 जणांविरुद्ध विविध कलमांखाली गुन्हे दाखल करण्यात आले आहेत.

गुप्त माहितीवरून राबविण्यात आली कारवाई

बार्शी तालुका पोलिस ठाण्याच्या हद्दीत पेट्रोलिंग सुरू असताना लवंगी मिरची कला केंद्र   मध्ये नियमबाह्य प्रकार सुरू असल्याची गुप्त माहिती पोलिसांना मिळाली. माहितीची खातरजमा करून पोलिसांनी 24 मे रोजी पहाटे सुमारे 1.30 वाजण्याच्या सुमारास छापा टाकला.

डान्सबारमध्ये सुरू होते नृत्य व ग्राहकांची गर्दी

छाप्यावेळी लवंगी मिरची कला केंद्र मध्ये नृत्य सुरू असल्याचे पोलिसांना आढळून आले. तसेच ग्राहकांची उपस्थितीही मोठ्या प्रमाणात होती. तपासादरम्यान संबंधित ठिकाणी कायद्याचे उल्लंघन होत असल्याचे निष्पन्न झाल्यानंतर पोलिसांनी तात्काळ कारवाई केली.

72 जणांविरोधात विविध कायद्यांनुसार गुन्हे

या प्रकरणात नृत्य करणाऱ्या महिला, ग्राहक, चालक आणि संबंधित व्यवस्थापनाविरुद्ध भारतीय न्याय संहिता, महाराष्ट्र पोलिस अधिनियम तसेच महाराष्ट्र दारूबंदी कायद्यांतर्गत गुन्हे दाखल करण्यात आले आहेत.

रोख रक्कम, मोबाईल व वाहने जप्त

कारवाईदरम्यान पोलिसांनी रोख रक्कम, मोबाईल फोन, विविध साहित्य, चारचाकी व दुचाकी वाहने तसेच मद्यसाठा असा एकूण 50,13,460 रुपयांचा मुद्देमाल जप्त केला आहे. बार्शी तालुक्यातील अलीकडील काळातील ही सर्वात मोठ्या पोलिस कारवायांपैकी एक मानली जात आहे.

वरिष्ठ अधिकाऱ्यांच्या मार्गदर्शनाखाली यशस्वी धाड

ही कारवाई पोलीस अधीक्षक अतुल कुलकर्णी, अपर पोलीस अधीक्षक विजय कवाडे आणि सहाय्यक पोलीस अधीक्षक अंजना कृष्णा यांच्या मार्गदर्शनाखाली पार पडली. बार्शी तालुका पोलिस ठाण्याचे प्रभारी अधिकारी सहायक पोलिस निरीक्षक महेश माने यांच्या नेतृत्वाखालील पथकाने ही कारवाई यशस्वी केली.

अवैध धंद्यांविरोधात पोलिसांचा स्पष्ट इशारा

लवंगी मिरची कला केंद्रवरील कारवाईमुळे परिसरात मोठी खळबळ उडाली असून अवैध व्यवसाय करणाऱ्यांना पोलिसांनी कठोर इशारा दिला आहे. अशा प्रकारच्या बेकायदेशीर धंद्यांवर भविष्यातही कठोर कारवाई सुरू राहणार असल्याचे पोलिसांनी स्पष्ट केले आहे.

💥 पहाटे 1.30 वाजता पोलिसांची धाड; लवंगी मिरची कलकेद्रा मधील गैरप्रकार उघड

बातम्या व जाहिरातीसाठी संपर्क: रियाज पठाण – 9405749898 / 9408749898