📢 “मोबाईल, टीव्ही बंद… मुलांच्या भविष्यासाठी सिरसाव गावाचा अभिनव संकल्प!”

दररोज सायंकाळी ७ ते ९ ‘सर्व बंद’; ग्रामपंचायतीचा ‘आपला जीव धाराशिव’ उपक्रम जिल्ह्यासाठी ठरणार आदर्श

स्टार माझा न्यूज परंडा | प्रतिनिधी

डिजिटल युगात मोबाईल, टीव्ही आणि इतर स्क्रीनसमोर वाढता वेळ ही पालकांसमोरील मोठी चिंता बनली असताना, धाराशिव जिल्ह्यातील सिरसाव ग्रामपंचायतीने मुलांच्या शैक्षणिक प्रगतीसाठी एक अभिनव आणि समाजोपयोगी उपक्रम हाती घेतला आहे. ‘आपला जीव धाराशिव’ या मोहिमेअंतर्गत दररोज सायंकाळी ७.०० ते रात्री ९.०० या वेळेत गावात मोबाईल, टीव्ही आणि इतर डिजिटल साधनांचा वापर बंद ठेवण्याचे आवाहन करण्यात आले आहे.

या दोन तासांत घरातील वातावरण पूर्णपणे अभ्यासपूरक राहावे, मुलांनी शांततेत अभ्यास करावा, पालकांनी त्यांच्यासोबत वेळ घालवावा, संवाद वाढावा आणि वाचनाची सवय लागावी, हा या उपक्रमामागील प्रमुख उद्देश आहे.

यासाठी ग्रामपंचायतीकडून लवकरच गावात सायरन बसविण्यात येणार असून, सायरनचा आवाज होताच प्रत्येक घरातील टीव्ही, मोबाईल व इतर स्क्रीन बंद करून मुलांना अभ्यासासाठी बसविण्याचे आवाहन करण्यात आले आहे. हा सायरन केवळ सूचना देणारा नसून, गावातील प्रत्येक मुलाच्या उज्ज्वल भविष्यासाठीची सामूहिक जबाबदारीची आठवण करून देणारा ठरणार आहे.

ग्रामपंचायतीने गावातील सुजाण नागरिक, माजी विद्यार्थी, शिक्षक आणि पालकांनीही या मोहिमेत सक्रिय सहभाग घ्यावा, असे आवाहन केले आहे. मुलांच्या शैक्षणिक गुणवत्तेत वाढ, कुटुंबातील संवाद वृद्धिंगत करणे, स्क्रीनचे व्यसन कमी करणे आणि अभ्यासासाठी सकारात्मक वातावरण निर्माण करणे, या दृष्टीने हा उपक्रम महत्त्वपूर्ण मानला जात आहे.

सिरसाव ग्रामपंचायतीचा हा प्रयोग यशस्वी ठरल्यास तो केवळ धाराशिव जिल्ह्यासाठीच नव्हे, तर राज्यातील इतर गावांसाठीही प्रेरणादायी ठरू शकतो. “आज स्क्रीन बंद… उद्या भविष्य उज्ज्वल” हा संदेश देणारा हा उपक्रम समाजात सकारात्मक बदल घडविण्याची क्षमता बाळगून आहे.

स्टार माझा न्यूज संपादक :- रियाज पठाण

📞 9405749898 / 9408749898