विद्यार्थ्यांच्या शिक्षणावरच घाला; शिष्यवृत्तीच्या पैशावर दलालांचा डल्ला?

स्टार माझा न्यूज, परंडा (प्रतिनिधी) – दिनांक :-10
बांधकाम कामगार नोंदणीच्या नावाखाली मोठा गैरप्रकार
परंडा तालुक्यात बोगस दलालांचा सुळसुळाट झाल्याचे गंभीर वास्तव समोर येत आहे. तालुक्यातील प्रत्येक गावागावात महिलांची बांधकाम कामगार म्हणून बोगस पद्धतीने नोंदणी करून कार्ड देतो व शासनाच्या विविध योजनांचा लाभ मिळवून देतो, असे आमिष दाखवून प्रत्येकी दोन हजार ते तीन हजार रुपये घेतले जात असल्याचे निदर्शनास आले आहे.
500 ते 700 लोकांचे फॉर्म भरल्याची खाजगीत चर्चा
या बोगस व्यवहारामध्ये परंडा तालुक्यातील तब्बल 500 ते 700 नागरिकांचे फॉर्म भरले गेले असल्याची खाजगीत जोरदार चर्चा सुरू आहे. मात्र या फॉर्मच्या आधारे संबंधित लाभार्थ्यांना प्रत्यक्षात कोणताही शासकीय लाभ मिळाल्याचे अद्याप समोर आलेले नाही. या संपूर्ण प्रकरणाची सविस्तर माहिती लवकरच जनतेसमोर मांडली जाणार आहे.
दलाल टोळीत दोन पुरुष व एका महिलेचा सहभाग असल्याची चर्चा?
या गैरप्रकारामध्ये दोन पुरुष व एका महिलेचा सहभाग असल्याचे खाजगीत बोलले जात आहे. यातील एक व्यक्ती स्वतःला बांधकाम कामगार विभागाचा अधिकारी असल्याची बतावणी करत असल्याची माहिती समोर येत आहे. या बनावट ओळखीच्या आधारे ग्रामीण भागातील भोळ्या-भाबड्या नागरिकांची आर्थिक फसवणूक करण्यात आली आहे.
शासनाच्या योजनांचे आमिष; गरीबांची दिशाभूल
शासनाच्या विविध योजनांचा लाभ मिळवून देतो, असे सांगून अनेक गरजू महिलांकडून पैसे उकळण्यात आले. अनेक महिलांनी पैसे दिल्यानंतरही त्यांना आजतागायत ना कार्ड मिळाले, ना कोणत्याही योजनेचा लाभ मिळाल्याचे वास्तव समोर येत आहे.
शालेय विद्यार्थ्यांच्या शिष्यवृत्तीमध्येही दलाली
या बोगस दलालांची मजल इतक्यावरच थांबलेली नसून, शालेय विद्यार्थ्यांच्या शिष्यवृत्तीचे फॉर्म भरण्यासाठी मिळणाऱ्या रकमेपैकी 20 ते 30 टक्के रक्कम दलालांकडून घेतली जात असल्याचेही बोलले जात आहे. यामुळे गरीब विद्यार्थ्यांच्या शिक्षणावरच घाला घातला जात असल्याचा आरोप होत आहे.
फसवणूक झालेल्यांची नावानिशी यादी कार्यालयात प्राप्त
या प्रकरणात फसवणूक झालेल्या अनेक नागरिकांची नावानिशी यादी स्टार माझा न्यूजच्या कार्यालयास प्राप्त झाली आहे. या यादीच्या आधारे लवकरच सविस्तर खुलासा करण्यात येणार आहे.
हा पहिला भाग; लवकरच मोठा पर्दाफाश
या गंभीर प्रकरणाचा सखोल माहिती घेणे सुरू असून, हा या विषयाचा पहिला भाग आहे. पुढील काही दिवसांत याचा दुसरा भाग प्रसिद्ध करून बोगस दलालांचा संपूर्ण पर्दाफाश करण्यात येणार असल्याचे परंडा प्रतिनिधी यांनी सांगितले
फसवणूक झालेल्यांना पुढे येण्याचे आवाहन,
ज्या नागरिकांची या बोगस दलालांकडून फसवणूक झाली असेल, त्यांनी निर्भयपणे पुढे येऊन स्टार माझा न्यूज कार्यालयाशी संपर्क साधावा, असे आवाहन परंडा प्रतिनिधींनी केले आहे.
बातम्या व जाहिरातीसाठी संपर्क :
संपादक रियाज पठाण – 9405749898 / 9408749898

Author: starmazanews

News analysts, reporters, and journalists keep the public updated about current events and noteworthy information.