स्टार माझा न्यूज, परांडा  (प्रतिनिधी) गोरख देशमाने – दिनांक : १७ एप्रिल २०२६

🔸 अंतिम लढतीत विजय मांडवेची बाजी
परंडा तालुक्यातील श्री क्षेत्र सोनारी येथे काळभैरवनाथ यात्रेनिमित्त आयोजित भव्य कुस्ती आखाड्यात अंतिम ५१ हजार रुपयांच्या लढतीत विजय मांडवे याने तात्या धुमाळे (पंढरपूर) याला पोकळ घिस्सा डावावर चितपट करत शानदार विजय मिळविला. या विजयासह त्याने रोख बक्षीस पटकावले.

🔸 उपांत्य लढतीत सुमीत मानेचा पराक्रम
दुसऱ्या क्रमांकाच्या ३१ हजार रुपयांच्या कुस्तीत सुमीत माने (अकलुज) याने छोटू जाधव याला तुल्यबळ लढतीत छडी टांग डावावर चितपट करून विजय मिळवला. या आखाड्यात एकूण सुमारे १५० लहान-मोठ्या कुस्त्या रंगल्या.
🔸 नामांकित मल्लांची उपस्थिती
या कुस्ती आखाड्यासाठी राज्यभरातील नामांकित मल्लांनी हजेरी लावली होती. सोनारी गाव कुस्ती खेळासाठी राज्यात प्रसिद्ध असून दरवर्षीप्रमाणे यंदाही मोठ्या उत्साहात आखाडा पार पडला.
🔸 मान्यवरांच्या उपस्थितीत उद्घाटन
कुस्ती स्पर्धेचे उद्घाटन मान्यवरांच्या हस्ते झाले. यावेळी श्यामनाथ महाराज, संजय पुजारी, समीर पुजारी, भाऊसाहेब खरसडे, धनंजय सावंत यांच्यासह अनेक मान्यवर उपस्थित होते.

🔸 लाल मातीवरील कुस्त्यांनी रंगत वाढवली
दुपारी ४ ते रात्री १० वाजेपर्यंत रंगलेल्या या आखाड्यात ढाक, घिस्सा, छडी टांग, कलाजांग, एकलांगी, कुंदा आदी विविध डावांनी मैदान गाजवले. हलगीच्या आवाजात मल्लांनी सादर केलेल्या चित्तथरारक कुस्त्यांमुळे प्रेक्षकांमध्ये उत्साह उसळला.
🔸 विजेत्यांना रोख बक्षिसांचा वर्षाव
या स्पर्धेत २०० रुपयांपासून ते ५१ हजारांपर्यंत रोख बक्षिसे देण्यात आली. रविंद्र खैरे, सुजीत भगत, संकेत हजारे, माऊली डांगे, गणेश शिकारे, स्वराज गाडे आदी मल्लांनी उत्कृष्ट कामगिरी करत विजय मिळवले.
🔸 उत्कृष्ट समालोचन आणि पंचांची कामगिरी
प्रसिद्ध निवेदक दिनेश गवळी (बार्शी) यांनी समालोचन केले. तर बापू मांडवे, माऊली गोडगे, विजय धुमाळ आदींनी पंच म्हणून जबाबदारी पार पाडली.
🔸 ग्रामस्थांचा उत्स्फूर्त सहभाग
या भव्य आखाड्याच्या आयोजनासाठी धनंजय सावंत, सरपंच परमेश्वर मांडवे यांच्यासह ग्रामस्थांनी मोठा पुढाकार घेतला.

📞 बातम्या व जाहिरातीसाठी संपर्क: संपादक रियाज पठाण – 9405749898 / 9408749898

Author: starmazanews

News analysts, reporters, and journalists keep the public updated about current events and noteworthy information.