स्टार माझा न्यूज, परांडा  (प्रतिनिधी) – दिनांक : …
🔴 सावंत घराण्यात राजकीय तणाव शिगेला
धनंजय सावंत भाजपच्या वाटेवर? परंडा–भूम–वाशीमध्ये मोठ्या उलथापालथीची शक्यता
📍 धाराशिव जिल्ह्यात हालचालींना वेग
धाराशिव जिल्ह्यातील भूम–परंडा–वाशी विधानसभा मतदारसंघात सध्या राजकीय वातावरण तापले असून, सावंत घराण्यातील अंतर्गत मतभेद उघडपणे समोर येऊ लागले आहेत. राज्याचे कॅबिनेट मंत्री आणि माजी आरोग्यमंत्री आमदार प्रा. डॉ. तानाजी सावंत यांच्या राजकीय वर्चस्वाला त्यांच्याच कुटुंबातून आव्हान उभे राहत असल्याची चर्चा जिल्हाभर सुरू आहे

🟠काका विरुद्ध पुतण्या?
धनंजय सावंत ‘धनुष्यबाण’ सोडून ‘कमळ’ हाती घेणार?
तानाजी सावंत यांचे पुतणे आणि जिल्हा परिषदेचे माजी उपाध्यक्ष धनंजय सावंत हे शिंदेसेनेला रामराम ठोकून भाजपमध्ये प्रवेश करण्याच्या तयारीत असल्याची खात्रीलायक माहिती समोर येत आहे. त्यामुळे परंडा–भूम–वाशी मतदारसंघात थेट काका विरुद्ध पुतण्या असा राजकीय सामना रंगण्याची चिन्हे आहेत.
🟠  तानाजी सावंतांचे विश्वासू सूत्रधार
मतदारसंघाची जबाबदारी धनंजय सावंतांकडेच
आमदार तानाजी सावंत हे राज्याच्या राजकारणात सक्रिय असताना, परंडा मतदारसंघातील सर्व स्थानिक व्यवस्थापनाची धुरा धनंजय सावंत सांभाळत होते. कार्यकर्त्यांपासून पदाधिकाऱ्यांपर्यंत प्रत्येकाचा संपर्क धनंजय सावंत यांच्याशी असायचा. मंत्रिमहोदयांपर्यंत थेट पोहोचण्यासाठी तेच मुख्य दुवा मानले जात होते.
🟠  दुरावा वाढत गेला…
कौटुंबिक मतभेदांचे राजकीय पडसाद
गेल्या काही महिन्यांपासून काका–पुतण्यातील नात्यात तणाव वाढत गेला. विधानसभा निवडणुकीदरम्यान स्थानिक व्यवस्थापन करणाऱ्या धनंजय सावंत यांना ऐन निवडणुकीत बाजूला ठेवण्यात आल्याची नाराजी होती. यानंतर कौटुंबिक मतभेदांमध्ये राजकीय अंतरही वाढत गेले.
🟠 सत्तेचा अनुभव, पण सन्मानाचा प्रश्न
उपाध्यक्ष व बांधकाम सभापती पदाची पार्श्वभूमी
जिल्हा परिषदेच्या मागील टर्ममध्ये महाविकास आघाडी सत्ता स्थापन करण्याच्या प्रयत्नात असताना, आमदार तानाजी सावंत यांनी भाजपला पाठिंबा दिला. त्या राजकीय समीकरणात धनंजय सावंत यांना उपाध्यक्ष व बांधकाम सभापती पद मिळाले. मात्र त्यानंतरही अपेक्षित सन्मान न मिळाल्याची भावना त्यांच्या समर्थकांमध्ये होती.
🟠  नगरपालिका निवडणुकीतील शांतता
भाजप–शिंदेसेना युती असतानाही अलिप्त भूमिका
भूम व परंडा नगरपालिका निवडणुकांमध्ये धनंजय सावंत यांची सक्रिय भूमिका दिसून आली नाही. राज्यात महायुती असतानाही त्यांनी स्वतःला निवडणूक प्रक्रियेपासून दूर ठेवले, हे त्यांच्या आगामी राजकीय निर्णयाचे संकेत मानले जात आहेत.
🟠  भाजपसाठी नवी ताकद?
परंडा मतदारसंघात संघटन मजबूत करण्याची संधी
धाराशिव जिल्ह्यातील चार विधानसभा मतदारसंघांपैकी परंडा मतदारसंघात भाजपचे संघटनात्मक बळ तुलनेने कमी आहे. हा मतदारसंघ सातत्याने मित्रपक्षाकडे राहिल्याने भाजप स्वतंत्र ताकद उभी करू शकला नाही. अशा परिस्थितीत धनंजय सावंत यांचा प्रवेश भाजपसाठी निर्णायक ठरू शकतो, अशी राजकीय वर्तुळात चर्चा आहे.
🗣️ धनंजय सावंत यांची भूमिका स्पष्ट
“मी जे काही आहे, ते माझ्या कार्यकर्त्यांमुळे आहे. जर त्यांना वाटत असेल की नवीन मार्ग निवडावा, तर त्यांच्या भावनांचा अनादर करणे मला मान्य नाही. सर्वांशी चर्चा करूनच अंतिम निर्णय घेणार आहे.”
— धनंजय सावंत, माजी उपाध्यक्ष, जिल्हा परिषद, धाराशिव
🔍 पुढील राजकीय गणित
धनंजय सावंत नेमका कधी भाजप प्रवेशाचा निर्णय जाहीर करतात, याकडे आता संपूर्ण जिल्ह्याचे लक्ष लागले आहे. हा निर्णय झाल्यास परंडा–भूम–वाशी मतदारसंघातील राजकीय समीकरणे पूर्णपणे बदलू शकतात.
बातम्या व जाहिरातीसाठी संपर्क:
रियाज पठाण – 9405749898 / 9408749898

Author: starmazanews

News analysts, reporters, and journalists keep the public updated about current events and noteworthy information.