⭐ स्टार माझा न्यूज, बार्शी (प्रतिनिधी) – दिनांक : 21 नोव्हेंबर 2025
बार्शी नगरपालिका निवडणुकीच्या रणसंग्रामात मोठा राजकीय ट्विस्ट पाहायला मिळाला आहे. शिवसेना युवासेनेच्या राज्य सहसचिव ॲड. उषा पवार (उषाताई) यांनी अखेर पक्षाचा आदेश मान्य करत आपला उमेदवारी अर्ज मागे घेतला आहे. मागील काही दिवसांपासून उषाताईंच्या नाराजीच्या हालचालींनी राजकीय वातावरण तापले होते. सोशल मीडियावरून त्यांनी व्यक्त केलेल्या भावनांमुळे बार्शीच्या राजकीय वर्तुळात मोठी खळबळ उडाली होती.
पक्षात दुर्लक्षित केल्याची भावना व्यक्त करून त्यांनी नाराजी जाहीर केली होती. मात्र परिस्थिती गंभीर वळण घेण्यापूर्वीच आमदार दिलीप सोपल आणि विश्वासभाऊ बारबोले यांनी थेट पुढाकार घेत उषाताई पवार-घोलप व ॲड. पांडुरंग घोलप यांच्याशी चर्चा करून परिस्थिती शांत केली. वरिष्ठ नेते पुढे आल्यानंतर उषाताईंनी मोठा राजकीय निर्णय घेत पक्षनिष्ठा कायम ठेवत अर्ज मागे घेतला.
बार्शीत निवडणुकीत शिवसेनेचे विजयाचे वातावरण असताना उषाताईंची माघार हा पक्षनिष्ठेचा ठसा ठरला आहे. पण या घडामोडींमुळे शहरातील समीकरणांमध्ये बदल होण्याची शक्यता नाकारता येत नाही. काही कार्यकर्त्यांचा दुसऱ्या पक्षात प्रवेश सुरू असल्याच्या चर्चांमुळे अंतर्गत नाराजीचे सूर अजूनही संपलेले नाहीत, हे स्पष्ट होते. मात्र वरिष्ठ नेत्यांच्या उपस्थितीमुळे परिस्थिती आटोक्यात येत असल्याचे चित्र दिसते.
बार्शीतील राजकारणाला नवीन वळण देणाऱ्या या घडामोडी पुढील काही दिवसांत कोणते नवे राजकीय रंग दाखवतील, याकडे सर्वांचे लक्ष लागले आहे.
बातम्या व जाहिरातीसाठी संपर्क: रियाज पठाण – 9405749898 / 9408749898
Author: starmazanews
News analysts, reporters, and journalists keep the public updated about current events and noteworthy information.
