बार्शी (प्रतिनिधी) | छावा संघटनेचे प्रदेशाध्यक्ष विजयकुमार घाडगे-पाटील यांच्यावर लातूरमध्ये करण्यात आलेल्या जीवघेण्या हल्ल्याच्या निषेधार्थ आज (दि. २१ जुलै) बार्शी शहरात छावा शेतकरी संघटनेच्या वतीने जोरदार आंदोलन करण्यात आले. यावेळी तहसीलदार यांच्यामार्फत मुख्यमंत्री यांना निवेदन देण्यात आले असून हल्लेखोरांवर भादंवि कलम ३०७ (खून करण्याचा प्रयत्न) अंतर्गत गुन्हा दाखल करण्यात यावा, अशी जोरदार मागणी करण्यात आली आहे.
पत्ते फेकल्याच्या वादातून बेदम मारहाण
रविवारी (दि. २० जुलै) लातूरमध्ये राष्ट्रवादी काँग्रेसचे प्रदेशाध्यक्ष सुनिल तटकरे यांची पत्रकार परिषद सुरू असताना छावा संघटनेचे काही कार्यकर्ते तिथे पोहोचले व कृषी मंत्री माणिकराव कोकाटे यांच्या ‘रमी खेळण्या’च्या व्हायरल व्हिडिओचा निषेध करत त्यांनी तटकरे यांच्या अंगावर पत्ते फेकले.
या प्रकारानंतर राष्ट्रवादीच्या कार्यकर्त्यांनी संतापून छावा संघटनेचे प्रदेशाध्यक्ष विजयकुमार घाडगे-पाटील यांना बेदम मारहाण केली. या मारहाणीत त्यांना डोक्याला, चेहऱ्याला, भुवयांना गंभीर दुखापती झाल्या असून बरगड्यांचे व पाठीच्या मणक्याचेही नुकसान झाले आहे. श्वास घेण्यास त्रास होऊ लागल्याने त्यांना लातूरच्या अपोलो हॉस्पिटलमधील आयसीयूमध्ये हलवण्यात आले आहे.
घटनेचा निषेध करत बार्शीत आक्रोश
या प्रकाराने राज्यभरात तीव्र प्रतिक्रिया उमटल्या असून बार्शी येथे छावा शेतकरी संघटनेचे कार्यकर्ते मोठ्या संख्येने जमले. कार्यकर्त्यांनी “हल्लेखोरांवर तातडीने ३०७ अंतर्गत गुन्हा दाखल करा, अन्यथा राज्यव्यापी आंदोलन करू” असा इशारा दिला.
बार्शी तहसील कार्यालयासमोर निषेध नोंदवत आंदोलकांनी जोरदार घोषणाबाजी केली. यानंतर शिष्टमंडळाने तहसीलदारांना निवेदन दिले. छावा संघटनेचे स्थानिक नेते, कार्यकर्ते व महिला कार्यकर्त्यांनी मोठ्या प्रमाणावर उपस्थिती लावली होती.
हल्ल्याचा मुख्य सूत्रधार सूरज चव्हाण यांचा – राजीनामा
या प्रकरणात राष्ट्रवादी काँग्रेसचे युवक प्रदेशाध्यक्ष सूरज चव्हाण यांचा पुढाकार होता, अशी माहिती समोर आली असून दबावामुळे त्यांनी आपल्या पदाचा राजीनामा दिला आहे. मात्र छावा संघटनेने राजीनामा अपुरा असल्याचे स्पष्ट करत हल्लेखोरांवर कठोर कारवाईची मागणी केली आहे.
बातम्या व जाहिरातीसाठी संपर्क: संपादक रियाज पठाण – 9405749898 / 9408749898
Author: starmazanews
News analysts, reporters, and journalists keep the public updated about current events and noteworthy information.
