परंडा प्रतिनिधी – गोरख देशमाने
परंडा तालुक्यातील श्री क्षेत्र सोनारी येथे श्री काळभैरवनाथ यात्रा मोठ्या उत्साहात आणि भक्तिभावात पार पडली. सालाबादप्रमाणे आयोजित झालेल्या या यात्रेत यंदा नवीन सागवानी रथ मुख्य आकर्षण ठरला. अंदाजे 400 वर्षांपूर्वीचा जुना रथ कमजोर झाल्याने देवस्थानचे विश्वस्त, पुजारी, मानकरी आणि ग्रामस्थ यांच्या निर्णयाने नवीन रथ तयार करण्यात आला आहे.
या रथासाठी 180 घनफूट गावठी सागवान लाकडाचा वापर करण्यात आला असून, सुमारे 50 लाख रुपये खर्च झाला आहे. हा खर्च देवस्थान ट्रस्ट आणि भाविकांच्या देणगीतून केला गेला.
शनिवार, दिनांक 26 एप्रिल, चैत्र वद्य त्रयोदशी या दिवशी उत्सव मोठ्या उत्साहात पार पडला. लाखो भाविकांनी श्री काळभैरवनाथाचा रथ ओढत जयघोष केला. बालकांनी गुलाल व खोबऱ्याची उधळण करून आनंद व्यक्त केला. संपूर्ण सोनारी नगरी “भैरवनाथाचे चांगभलं”, “माकडाचं चांगभलं”, “सांगोल्याच्या काठीचं चांगभलं” अशा गजराने दुमदुमून गेली होती.
यात्रेनिमित्त शनिवारी पहाटे श्री काळभैरवनाथाच्या मूर्तीची आयुष्य पूजा करण्यात आली. दुपारी बारा वाजता पुरणपोळीचा नैवेद्य अर्पण करण्यात आला. त्यानंतर साजेस्या फुलांनी सजवलेल्या नवीन रथात श्री काळभैरवनाथाची उत्सव मूर्ती ठेवण्यात आली.
भैरवनाथ देवस्थानचे मुख्य विश्वस्त पुजारी संजय महाराज पुजारी व समीर महाराज पुजारी यांनी धुपआरती केली. परंपरेनुसार तुतारी, पताका, हलगी, वाद्यवृंद यांच्या गजरात रथ मिरवणूक काढण्यात आली. यावेळी तहसीलदार निलेश काकडे यांच्या हस्ते श्रीची आरती करण्यात आली.
यात्रेस जि.प. माजी उपाध्यक्ष धनंजय सावंत, माजी नगराध्यक्ष सुभाषसिंह साळीवाल, माजी जि.प. अध्यक्ष बाळासाहेब हाडोंगिरीकर, झेप माजी सभापती नवनाथ आप्पा जगताप, रिपाई प्रदेश सरचिटणीस संजयकुमार बनसोडे, नायब तहसीलदार पांडुरंग माडेकर, पोलीस निरीक्षक खरड यांच्यासह विविध सामाजिक, शैक्षणिक, राजकीय क्षेत्रातील मान्यवर उपस्थित होते.
महाराष्ट्र व कर्नाटक राज्यातून सुमारे 5 ते 6 लाख भाविकांनी या यात्रेला हजेरी लावून काळभैरवनाथाचे दर्शन घेतले. गुलाल व खोबऱ्याच्या उधळणीने संपूर्ण वातावरण भक्तिभावाने भारले होते.
यात्रा काळात आरोग्य विभाग, महसूल मंडळ, महावितरण, राज्य परिवहन महामंडळ, भैरवनाथ देवस्थान ट्रस्ट, यात्रा उत्सव कमिटी व सोनारी ग्रामपंचायत यांनी उत्कृष्ट व्यवस्थापन केले. यात्रेत विविध रहाटपाळणे, खेळणी व खाद्यपदार्थांचे स्टॉल्स थाटले होते.
बातम्या व जाहिरातीसाठी संपर्क : संपादक रियाज पठाण – 9405749898 / 9408749898
Author: starmazanews
News analysts, reporters, and journalists keep the public updated about current events and noteworthy information.
