स्टार माझा न्यूज परांडा प्रतिनिधी गोरख देशमाने.
परंडा: महालिंगराया यात्रा कुस्ती स्पर्धेने रंगतदार माहोल
परंडा, ता. १५ (प्रतिनिधी) – मौजे आसु (ता. परंडा) येथील ग्रामदैवत महालिंगराया यात्रा भक्तिमय वातावरणात पार पडली. यात्रेनिमित्त आयोजित भव्य कुस्ती आखाड्यात महाराष्ट्रभरातील नामवंत मल्लांनी दमदार कुस्त्या सादर करत प्रेक्षकांची मने जिंकली. या कुस्ती स्पर्धेत ३१ हजार रुपयांच्या इनामासाठी झालेल्या अंतिम कुस्तीत विजय वाघे आणि वैभव जाधव यांच्यात अटीतटीची झुंज होऊन ती बरोबरीत सुटली.
तीन मिनिटांत अखेरचा डाव
कुस्ती आखाड्यातील विशेष क्षण म्हणजे मल्ल शिवराज लोकरे याने अवघ्या तीन मिनिटांत बॅक थ्रो डावावर अक्षय शिंदे यास चितपट केले आणि रोख बक्षीस पटकावले. या मैदानात एकूण २०० कुस्त्या रंगल्या, जिथे लहान व मोठ्या मल्लांनी आपली कुस्ती कौशल्ये दाखवली.
भक्तिरसात न्हालेली यात्रा
महालिंगराया यात्रेचा मुख्य दिवस १२ फेब्रुवारी (बुधवार) रोजी पार पडला. देवाच्या छबिना मिरवणुकीसह धार्मिक विधी, भाकवणूक आणि भंडाऱ्याचा सोहळा मोठ्या उत्साहात झाला. तीन दिवस चाललेल्या या यात्रेने गावात उत्साहाचे वातावरण निर्माण केले होते.
कुस्ती स्पर्धेतील प्रमुख झुंजी
कुस्ती आखाडा १३ फेब्रुवारी (गुरुवार) दुपारी ४ ते रात्री ८ या वेळेत पार पडला. कुस्तीच्या सुरुवातीला मान्यवरांच्या हस्ते आखाड्याचे पूजन झाले. यामध्ये १०० रुपयांपासून ते ३१ हजार रुपये पर्यंतच्या बक्षिसांसाठी जोरदार कुस्त्या लढविण्यात आल्या.
कुस्ती आखाड्यात महाराष्ट्रातील विविध भागांतील मल्लांनी सहभाग घेतला. विशेषतः किशोर भोसले, शिवाजी लवटे, रोहित जाधव, पृथ्वीराज बुरुंगे, राज पाटील, सदानंद मारकड, कुणाल पवार, श्रीराम शिंदे, शंकर कोळपकर, समर्थ माळी, अंगद जगदाळे, रोहित माळी, भैरव घोगरे, अभिषेक जामकर, ओंकार जगताप, युवराज जाधव, बाळराजे गवळी, सुरज लोकरे या मल्लांनी उत्तम प्रदर्शन करत विजय मिळवले.
महिला कुस्तीगीरांचा गौरव
या कार्यक्रमात महिला कुस्तीगीरांचा विशेष सन्मान करण्यात आला. महाराष्ट्र चॅम्पियन अहिल्या लवटे, रोहिणी मेहेर आणि राधा शिंदे यांचा कुस्ती आखाड्यात गौरव करण्यात आला.
शरीरसौष्ठवाचे प्रदर्शन
कुस्तीबरोबरच शरीरसौष्ठव विजेता रोहित बुरुंगे याने बॉडी बिल्डिंगचे आकर्षक सादरीकरण करत प्रेक्षकांना भारावून टाकले.
कुस्ती स्पर्धेतील पंच व आयोजकांचे योगदान
या कुस्ती स्पर्धेचे पंच म्हणून अनंता बुरंगे, समाधान जाधव, बबलू काझी, अविनाश जाधव, रघुनाथ मासाळ, महावीर इतापे, कुंडलिक खुणे, धनाजी यादव यांनी उत्कृष्ट कामगिरी बजावली.
यात्रा आणि कुस्ती आखाडा यशस्वी होण्यासाठी अविनाश जगताप, ताहेर पटेल, रोहिदास बुरुंगे, सुजीत जाधव, माजी जि. प. सदस्य शंकर इतापे, मारुती मासाळ, चंद्रकांत जाधव, शफीक पटेल, माजीद पटेल, विकास यादव, विश्वास माने, बालाजी यशवद, धनाजी यादव, संतराम बुरुंगे, धनाजी यशवद आणि समस्त ग्रामस्थांनी मोठा सहभाग घेतला.
श्रोत्यांना खिळवून ठेवणारे समालोचन
या कुस्ती आखाड्याचे समालोचन राजाभाऊ देवकते यांनी केले.
स्टार माझा न्यूज संपादक :- रियाज पठाण 9405749898 /9408749898
Author: starmazanews
News analysts, reporters, and journalists keep the public updated about current events and noteworthy information.
