स्वसंरक्षण प्रशिक्षण कार्यक्रमाचे आयोजन: मुलींच्या सुरक्षेसाठी पुढाकार

परांडा प्रतिनिधी गोरख देशमाने/ दि. 24 डिसेंबर 2024

परांडा येथील रा. गे. शिंदे महाविद्यालयात मुलींसाठी स्वसंरक्षण प्रशिक्षण कार्यक्रमाचे आयोजन करण्यात आले. वीर कराटे मार्शल आर्ट्स अकॅडमी आणि महाविद्यालयातील क्रांतीज्योती सावित्रीबाई फुले युवती मंच यांच्या संयुक्त विद्यमाने आयोजित या कार्यक्रमाला विद्यार्थ्यांचा मोठा प्रतिसाद मिळाला.

कार्यक्रमाच्या अध्यक्षस्थानी प्राचार्य डॉ. सुनील जाधव होते, तर प्रमुख पाहुणे म्हणून परंडा तालुक्याचे मुख्य प्रशिक्षक श्री. पांडुरंग ठोसर आणि संतोष शिंदे उपस्थित होते. व्यासपीठावर उपप्राचार्य डॉ. महेश कुमार माने, सांस्कृतिक विभागप्रमुख डॉ. शहाजी चंदनशिवे, प्रा. विजय जाधव, तसेच टीव्ही नाईनचे पत्रकार श्री. शितल कुमार मोठे उपस्थित होते.

प्रशिक्षणातील महत्त्वाचे मुद्दे
श्री. पांडुरंग ठोसर आणि संतोष शिंदे यांनी विद्यार्थिनींना स्वसंरक्षणाचे महत्त्व पटवून दिले. त्यांनी कराटे, नॉन चॉप स्टिक, रोड फाईट, फिटनेस जिम्नॅस्टिक अशा विविध खेळांद्वारे स्वसंरक्षणाचे धडे दिले. एखादी आपत्तीजनक घटना घडल्यास त्यास कसे सामोरे जायचे, याची प्रात्यक्षिकेही सादर केली.

विद्यार्थ्यांचा सहभाग आणि सादरीकरण
महाविद्यालयाच्या कनिष्ठ आणि वरिष्ठ विभागातील विद्यार्थिनींनी मोठ्या संख्येने या कार्यक्रमात सहभाग घेतला. क्रांतीज्योती सावित्रीबाई फुले युवती मंचाच्या पदाधिकारी आणि सदस्यांनी या उपक्रमासाठी विशेष योगदान दिले.

कार्यक्रमाचे सूत्रसंचालन व प्रास्ताविक डॉ. शहाजी चंदनशिवे यांनी केले, तर प्रा. विजय जाधव यांनी आभार प्रदर्शन केले.

कार्यक्रमाचा उद्देश
मुलींमध्ये आत्मविश्वास वाढवणे, त्यांना शारीरिकदृष्ट्या सक्षम बनवणे आणि स्वसंरक्षणाच्या तंत्रांचे शिक्षण देणे हा या उपक्रमाचा उद्देश होता.
कार्यक्रमाच्या यशस्वी आयोजनाबद्दल महाविद्यालय आणि सहभागी प्रशिक्षकांचे सर्व स्तरातून कौतुक होत आहे.